太子手記：周文耀元旦做老爺
每逢年尾，都係嫁娶嘅旺季兼好日子，金融圈近期亦喜事多籮籮，多位金融界猛人家裏都有喜事辦，好似港交所（00388）前行政總裁周文耀會喺嚟緊嘅元旦日娶新抱，而金銀業貿易場永遠名譽會長馮志堅就剛剛嫁女，真係恭喜晒！周文耀於明年一月一日娶新抱，聽聞唔少金融界人士獲邀出席婚宴，由於當日係公眾假期，且係元旦日，周文耀一早就叫定朋友預留日子，飲佢呢餐喜酒。
退休生活多姿多采
其實呢排周文耀都有好多開心嘢，好似早前獲頒金紫荊星章，依家又娶新抱，真係喜事齊齊來。
周文耀今年初喺港交所退休，依家係數碼港主席，又係中行（03988）獨立非執行董事，亦有不少公職，退休生活可謂非常忙碌及精彩，早幾日佢至返去香港大學專業進修學院，同超過100名校友分享佢嘅工作體驗。
周文耀近排喜事重重，元旦日會娶新抱。 （資料圖片）