期指攻略：押注波幅收窄 贏面大
雖然仲有三個星期就踏入一一年，不過中國人民銀行無提早收爐，上周五宣布調高人民幣存款準備金率0.5個百分點，係今年第六次，又再鎖定3,000億元人民幣資金在銀行體系內，唔准流出市面，原因係十一月份內地CPI由4.4%抽到上5.1%，創兩年新高。
上周五滬綜指偷步跌轉升，港股也幾乎完全收復早市失地，僅跌8點，收市報23,162點，好明顯市場賭周末最壞消息盡出，包括通脹及進一步的貨幣緊縮。不過，今次人行加存款準備金率而唔直接加息，上周五尾市升勢會唔會只係一廂情願，今日早市會有答案，始終加息陰霾仲繼續籠罩股市。
22965點一閃即逝
一直等大市確認升穿23,867點，又或者下破23,000點支持，跟勢追買或追沽，上周五以為機會來臨，可惜恒指早市試穿23,000點後，並未見淡友多踩一腳，現貨低位22,965一閃即逝，下午更收復失地，未能如願開倉追沽，今日市場對只加存款準備金率唔加息有多大反應，相信早市會一清二楚，但與其堅持賭一邊，臨近假期押注市場引伸波幅開始收縮，贏面更大。上周提議建一個23,200點馬鞍式期權短倉套裝，理論期權金由上周四的818點收窄到786點，看官如果認為每日30至40點的時間溢價損耗都夠和味，不妨一試。
