股海實戰：南車時代直衝30元關

前晚美股跌幅較預期細，加上昨日內地A股回穩，港股順勢高開，恒指重上23,000點樓上，全日高位23,166點，午後承接不足，收市僅升127點，報23,023點，資金轉移焦點至與指數升跌冇大關係嘅細價股身上，零售股懶理炮火聲，繼續炒高。不過，正所謂「十分紅時已成灰」，阿莊認為呢轉本地零售股炒得差唔多，未來兩周宜把握沽貨獲利嘅機會。

近日一直捱沽嘅地產股終於有喘息機會，但地產代理股美聯集團（01200）就再一日低收，報6.15元，跌0.16%。如今大行普遍估計，喺政府推出新措施打擊樓市短炒個案之下，樓價將會有5至10%嘅跌幅，但平心而論，特區政府以行政手段令樓市回歸基本步，其實未必係壞事。

昨日市傳本月內銀已幾乎用盡今年嘅新增信貸額度，故見內地股市近期交投明顯縮減，除咗因為政策不明朗之外，冇咗銀行嘅「大水喉」先至係真正原因，所以阿莊早幾日話，A股炒家今年可以提早收爐，唔係空口講白話！以滬綜指而言，2,700點係一個較大嘅支持區，若然冇咩重大負面消息，今個跌浪嚟到呢個水平應該可以回穩，年底前市況將反覆偏軟，直至明年初先至有機會借「十二五」規劃等國策概念炒上。

新股好孩子國際（01086）昨日掛牌，全日高位6.17元，收報5.8元，較招股價升18%。反觀早前認購反應熱烈嘅半新股熔盛重工（01101），掛牌首日見過8.15元後，股價一直潛水，昨日更曾失守7元關，低見6.95元，收報7.05元，較招股價低11%。

細價股異軍突起

市況未明，游資轉攻細價股，見昨日午後個別二、三線股異軍突起，就如勵晶太平洋（00575），一係唔升，一升超過兩成，以全日高位0.365元收市；隻中國木業（00269）昨日升15%。

前日阿莊沽出嘅神州數碼（00861），發行嘅TDR昨日喺台灣掛牌，本港報價曾低見15.58元，收報16.02元，跌4%，好在先一步食胡！此外，阿莊話可以睇位加注嘅中國南車（01766），昨日大清早排咗8.8元冇做過，會繼續耐心等候機會。

其實除咗中國南車之外，專做鐵路機車電器系統嘅南車時代（03898），亦受惠內地大幅擴建鐵路網絡，今年首九個月營業額已達到40億元人民幣，純利同比接近翻一番，至7億元人民幣。

由於下半年公司開始批量交付新一代時速350公里動車組電氣系統產品，並加快拓展城軌產品，估計全年業績表現將優於市場預期，現價明年預測市盈率低於二十倍，估值具上調空間。近日其股價正醞釀向上突破，唔嫌價位大，26元邊下注，目標試衝30元關，穿24.5元止蝕。

戰報

勵晶太平洋（00575）

上周三姚午齊推介勵晶時，低位只有0.285元，昨日股價急升，最後更以全日高位0.365元收市，累積升幅28%。

卓悅控股（00653）

志強上周五推介的卓悅，昨日股價持續向好，最高升過上1.53元，較推介當日低位曾見1.42元，升近8%。