中金十五歲群星賀

內地投行一哥中國國際金融，已經成立咗十五年，尋日喺香港舉行酒會，唔單止汪建熙、哈繼銘呢啲中金舊人一早到場祝賀，連港交所（00388）主席夏佳理、前金管局總裁任志剛等本港金融圈猛人亦齊齊捧場，唔怪得身為主人家嘅朱雲來成晚都笑容滿面，心情勁靚。

十五周年咁大件事，梗係玩大佢啦，除咗香港之外，佢哋仲喺北京、上海同紐約搞咗連串活動，董事長李劍閣同總裁朱雲來忙個不停，而今次喺香港嘅酒會，更加係星光熠熠，中投國際（香港）公司董事長劉遵義、永隆銀行行政總裁朱琦、財經事務及庫務局前局長馬時亨、同埋新世界發展（00017）執行董事鄭志剛等亦有到賀。

朱雲來做東心情靚

雖然中金呢兩年喺紐約、倫敦同新加坡都開咗office，不過，香港始終係中金發揮融資橋樑作用嘅重要基石。朱雲來成晚忙到氹氹轉，雖然冇時間停落嚟同大家講吓未來嘅發展大計，不過由佢嘅笑容都感受到佢喜悅嘅心情。

中金喺呢十五年來，做過唔少大刁，喺A股同中資企業海外IPO中，中金嘅總承銷金額分別達到6,460億元同924億元，遙遙領先其他境內外嘅投行，而且喺前十大A股IPO同前十大中資公司海外IPO中，中金分別主承銷咗九間，一哥地位穩如泰山。