期指攻略：調整完成與否看23899

假如認定特區政府落重藥打擊炒樓，地產股大跌，會拖累港股直奔23,000點，尋日應該受到沉重教訓。即使昨日五大香港地產股急跌，但也只係講緊拖低恒指66點左右，影響力微乎其微，反而大市觀望氣氛極其濃厚，全日成交唔到800億元，係十一月以來第二低紀錄，恒指收市跌81點，即月期指跌73點，報23,575點，高水51點。

十一月期指昨低開188點，報23,460點，同兩個重要支持23,213點及23,141點頗有距離，昨日按計劃開市半注揸倉，見下午試23,414點立即強力反彈，令筆者對今注開好倉信心增加不少，帳面暫有過百點在手，提供了一定的緩衝。

好倉止蝕定23141

至於中期調整是否完成，關鍵依然係恒指能否升穿23,866至23,899點的阻力區，升穿唔單止破壞頭肩頂阻力營造的不利形態，也可以盡快扭轉10日線（23,983點）跌穿20日線（23,937點）的劣勢，好倉才有資格繼續玩落去。

假如按策略昨日入市，並計劃揸好倉去到結算，能夠承受300點的損失，筆者建議以23,141點作為止蝕。然而，如果純粹想作一兩天嘗試，唔反彈立即平倉的，跌穿上周四開市價23,370點，也應先避其鋒。