周光暉獲傑出董事獎
香港董事學會尋日公布二○一○年度傑出董事獎，今屆都有不少知名人士得獎，好似合和實業（00054）執行董事胡文新、置富產業信託（00778）非執行董事趙國雄等，喺非恒生指數成分股組別獲獎。恒生指數成分股組別得獎者就包括中遠太平洋（01199）獨立非執行董事周光暉。
今次攞獎別具意義
周光暉獲傑出董事獎，都算實至名歸，而且別具意義。何解？大家都知，佢係香港會計師公會前會長，對企業管治一向好熟悉，更特別嘅係，佢以前做過董事學會副主席，今次董事學會頒呢個獎畀佢，係咪錦上添花呢？
董事學會已經係第十年舉辦傑出董事獎選舉，尋日就由董事學會主席黃天祐主持典禮，佢話獎項旨在表揚和推廣董事專業化嘅重要性，事實上專業董事乃董事會得以有效運作嘅關鍵，今年度傑出董事獎選舉嘅主題為「強化企管，提升業績」。而傑出董事獎籌委會主席張永銳就話，要在芸芸優秀公司中挑選得獎者係好難嘅事。