太子手記：國美陳曉被轟講大話

國美（00493）股權爭奪戰近期似乎有平息嘅迹象，獨立股評人David Webb就喺呢個時候突然發炮，話國美主席陳曉及其他管理層對外嘅口徑，前言不對後語，炮轟陳曉兩年前涉嫌講大話。

陳：講真相會掀恐慌

事緣黃光裕喺○八年十一月被捕，國美喺同年十二月十日發咗通告，話公司無受到黃光裕事件調查影響，公司業務、營運及供應商嘅關係正常。

不過，國美向股東發過一份通函，提及當時嘅情況，原來公司正面對銀行突然取消循環信貸、供應商要求提早找數等問題。

David Webb就引述咗Matthew Forney's Fathom China Ltd為研究機構GaveKal Dragonomics撰寫嘅報告，陳曉好老實咁同報告撰寫人話，「當時如果講出真相嘅話，會引起恐慌，外界會好擔心國美嘅情況，我相信任何人喺呢個環境下都會咁做。」

Webb認為，咁即係陳曉承認國美高層喺通告中講大話，因為當時發表呢張通告，陳曉已成為國美主席，所以一定知道國美嘅真實情況，Webb又話，絕對唔能夠接受陳曉呢個做法，因為呢個舉動會違反證監會規定，最高可罰款1,000萬元及監禁十年。

國美回應話，其實佢哋只不過係同分析員輕鬆對話，講番兩年前嗰陣時嘅話題，同公司兩年前發表嘅通告，無任何矛盾嘅地方。