股海實戰： 亞洲水泥迎接新機遇

上周五港股表現波動，恒指中午曾低見23,252點，惟午後內地A股倒升，恒指跌幅亦收窄，最終收報23,605點，跌31點，成交975億元。

港股收市後，隨即傳來特區政府宣布新一輪打擊樓市炒風措施，大致針對短炒交易，透過提升印花稅增加炒賣成本，並收緊樓宇按揭成數。阿莊相信，凡此種種可有效減少樓市短炒個案，壓抑炒風。

如今睇嚟，班大戶都係春江鴨，恒生地產指數由本月上旬高位33,816點，回落至上周五低位30,692點，跌幅達9.2%，沽得狠且快。

除咗本地市場有重大消息之外，上周五傍晚人行宣布調高存款準備金率，呢個可能又係另一個「春江鴨」事件，消息靈通炒家知道阿爺只係再加存款準備金率，短期未必會再加息，故入市撈底，致使上周五A股止跌回升收場。

A股炒家提早收爐

講到內地，時近年尾，物價上升既受季節性因素影響，再加上熱錢充斥，人為炒作隨處可見，通脹壓力逼人，促使國務院近日強硬表態決心控制物價。阿莊亦相信，阿爺做事有心有力，見到早前熱炒嘅農產品，上周價格開始下滑，講到底班炒家都好識時務，喺必需品限價措施推出前斬倉離場。睇怕年底前諸如此類嘅市場整頓仍會繼續，A股炒家今年可以提早收爐，明年再戰。

個股方面，股海風高浪急，上周阿莊一連推介咗領匯房產基金（00823）、中銀香港（02388）及粵海投資（00270）三隻具防守性嘅股份，可謂應景之作，但誠如阿莊上周所講，短期宏調措施並不影響個別重要產業嘅改革方向，故市況利淡，反係時候留意低吸相關股份嘅機會。

以水泥股為例，推動產業汰弱留強嘅措施持續，穩執行業牛耳者固然唔需要憂慮，但地區性嘅中型水泥商就要面對現實，與同業謀求合併，才能找到生存空間。上周，山水水泥（00691）宣布，可能與亞洲水泥中國（00743）以及其母公司─台灣上市嘅亞泥股份，喺中國遼寧與內蒙等地進行合作，各方已就此訂立諒解備忘錄，排他期至明年五月一日前。

初步了解，是次合作，具體係亞泥股份有意收購山水水泥少於10%嘅股權，而亞泥中國將以透過購買山水水泥多家附屬公司權益方式，持有投資合營公司不超過三成股權。

雖則今次只係合作諒解備忘錄，但消息足以叫投資者聯想到，日後山水水泥與亞泥中國會否親上加親謀合併。論牌局，亞泥中國市值較細，且大股東亞泥股份持股量達73%，客觀條件有機會成「被併者」，但無論如何，面對近年業務受地區性所限制，也許今次舉措可為亞泥中國嘅小股東帶來新希望。

戰報

六福集團（00590）

May上周三推介六福集團，當日低位21.8元，周五反彈到26元全日高位收市，三日累積升幅19.2%。

高力集團（01118）

積奇介紹高力集團，上周四推介日低位0.71元，周五強力反彈，最高見過0.85元，累積升幅19.7%。