股海實戰：建滔積層板不妨冷敲

內地A股反彈無以為繼，昨日再度尋底，滬綜指插穿2,900點關，收報2,894點，跌3.9%。事緣人行行長周小川開腔，指通脹已成為宏觀調控領域中備受關注嘅問題，故有關中央政府將出「組合拳」以控制價格過快上漲嘅傳聞四起，有指人行將於短期內再度加息，又有指內地銀行急急追收貸款，致使同胞們要沽貨班「水」回京應急云云。

另有消息指，明年上半年內銀新增貸款目標可能亦須要因應政策調整而作出向下修訂，故見昨日內銀股受壓，工行（01398）、建行（00939）及招行（03968）同跌逾2%收市。

美國聯儲局一邊放水，中國人行就一邊吸水，究竟呢招行唔行得通，有咩後遺症，真係要等着瞧，但眼前所見市況已變得十分複雜，投資者入市要加強風險意識。

受累A股低收，恒指尋日失守24,000點關，收報23,693點，跌334點，大市成交1,018億元。基本上，恒指已經落番支持區，再落就要睇22,800至23,000點水平。阿莊就相信，呢期大市好興提早消化負面消息，故若短期真係有咩壞消息出現，分分鐘個市會掉頭略作反彈，但之後發展係點，就要觀望反彈力度再作評論。大方向變得迷茫，相信仍然留在場內嘅游資會改變策略，轉炒個別板塊度日。昨日A股市場醫藥股有異動，話唔定炒風南下，可順勢關注相關股份，建議留意聯邦制藥（03933）及中國生物製藥（01177）。

考慮到要增持現金，繼沽出港交所（00388）後，阿莊昨日上晝以平均價84.95元沽出滙豐控股（00005）1萬股，獲利約2.8萬元。

產能已達滿負荷

市場波動性增加，若要揀攻守兼備之選，周一阿莊推介嘅領匯房產基金（00823）可視為對象。另一隻值得一提嘅高息股係建滔積層板（01888），上周初股價升抵8.37元高位後觸發調整，本周初跌至低位7.82元才告回穩，昨日逆市反彈，收報7.97元，升0.13元。

據建滔積層板中期業績所講，由於今年五、六月其覆銅面板客戶調整庫存，致令定單有所回落，但七月底開始定單已出現強勁反彈，令集團大部分覆銅面板廠產能已達到滿負荷，相信受惠於內地電子產品消費增長，其覆銅面板業務前景樂觀。

早前建滔化工（00148）以每股7.6元作價配售建滔積層板股份，但消息未對其股價造成太大沽壓，反而及後權益披露資料顯示，有基金加入接貨行列。理論上，若然是浪調整其股價能守喺配股價之上，應該唔使太過驚青，反正現價計今年預測市盈率介乎八至十倍，息率3.5厘，論估值唔係貴，後市仍有望再試衝五十二周高位8.56元，趁近期跌市，睇睇可唔可以冷手執個熱煎堆！

戰報

廣州藥業（00874）

錢進上周四指廣藥升勢慢火煎魚，昨日逆市做好，並高見9.49元，較推介當日低位8.85元累升逾7%。

+7%

華彩控股（08161）

冼金基推介嘅華彩，本月一日低位0.295元，昨升至0.34元，累升15%。

+15%