股神接班人現真身
股神巴菲特上個月底宣布委任年僅三十九歲嘅對沖基金經理庫姆斯，作為其首席投資總監後，即幾乎等於做硬佢接班人，雖然各界都爭相翻查庫姆斯嘅身世，但資料有限，連佢嘅廬山真面目都一度成謎，甚至有人肯出錢買相。事隔一個月，終於有兩個傳媒影到佢嘅相，搞到如獲至寶一樣。
《彭博社》尋日就登咗幾張庫姆斯嘅相，聲稱係喺十月三十日佢出席史丹福嘅曲棍球比賽時所攝，身穿便服嘅庫姆斯，都有啲年輕氣息，差不多同一時間，《財富》雜誌都有登佢嘅相，據講兩張相嘅拍攝時間只相距兩個星期，係庫姆斯出席巴郡董事會議嘅照片，身穿整齊西裝嘅佢，成個沉實穩重生意人一樣。兩張相分別應該係受衣着影響。
明年一月巴郡返工
庫姆斯仲要為現時管理緊嘅對沖基金執埋啲手尾，要到明年一月先可以正式去巴郡返工。
巴菲特亦向董事局交代庫姆斯嘅職權。原來庫姆斯初期只會管理約20億至30億美元嘅投資，雖然金額只係巴郡總值1,130億美元投資組合嘅九牛一毛，但已經遠遠大過庫姆斯依家管理嘅4億美元對沖基金。庫姆斯初期人工將會同GEICO資本部舵手辛普森一樣，除咗底薪仲可以據投資表現跑贏標指比例獲派花紅。