星展晚宴 鍾少權變青蜂俠
臨近年尾好多銀行都搞番個周年晚宴，星展香港今年揀咗喺博覽館搞，第一次所有職員都出席，陣容有幾千人，不過撞正全城熱話嘅電子版《清明上河圖》展覽，做咗「康樂組組長」嘅星展香港客戶、存款及抵押貸款高級副總裁鍾少權（Derek），淨係要搞掂人流安排都花唔少心機。
Derek絞盡腦汁之後，「人潮管制措施」終於出台，就係租幾架巴士，管接管送啲同事，聽落服侍好鬼周到。入到主菜就係晚宴嘅角色扮演，條件係用星展紅色同黑色做主題，Derek一樣玩創意，成個部門戴晒眼罩，連佢都變埋身做青蜂俠，但最後都不敵公關部，因為女士用利是封製成裙襬，千嬌百媚令人拜服。
豐盛理財客有大抽獎
諗頭多多嘅Derek仲話，星展香港嚟緊會先針對戶口資產總值達100萬或以上嘅豐盛理財客，包括推豐盛理財白金信用卡同亞洲旅遊大抽獎等，而且依家外匯市場咁波動，會用集團旗下的外匯投資平台提供唔同服務，又會強化財富管理業務同提升對內地客戶嘅服務。