Fundman睇市：聯想 5.5元樓下可買

升市莫估頂，跌咗兩日後，港股尋日掉頭升番199點，報24,700點，周三的跌幅幾乎一日追番晒，藍籌升勢都算全面，內銀、內險及資源股都被掃高。

正所謂家和萬事興，國美電器（00493）同股東黃光裕和解，令呢隻大落後內需股一彈就一成九，報3.24元，創今年收市新高。友邦（01299）收市後選入MSCI，跟隨指數的基金狂掃下，錄得146億元成交，係上市日以外的最高紀錄，佔大市總成交一成二，認真誇張，可見今時今日，追隨MSCI指數的基金的確唔少。中行（03988）及建行（00939）成交額縮番晒，全日分別得240球及257球易手，是兩股踏入十一月以來最低，供股除權之後，唔供的套戥沽盤睇怕完成得八八九九，估計短期會有技術反彈。兩股之中，筆者比較鍾意中行，皆因其估值夠吸引。另外，二三線之中，值得一提的是，中信資源（01205），分拆的中信大錳（01091）尋日截飛，據聞無論配售或者公開發售部分都相當熱爆，但中信資源卻升唔起，皆因市場擔心乖仔中錳登場，基金要仔唔要乸，故股價出現反高潮。

A股向上機會仍高

國家統計局公布十月內地通脹率4.4%，是兩年多以來最高，比九月再擴大0.8個百分點，頭十個月累積計，CPI升3%，要控制全年通脹在3%樓下，機會似乎有點渺茫，但A股並無因為通脹爆燈，擔心惹來新調控措施而回落，滬綜指再升32點，報3,147點，要多得人行在CPI出籠之前，加咗50點子存款準備金率，市場有晒心理準備十月通脹爆燈。其實以大約十四倍市盈率，只要內地好好管理通脹預期，股市向上機會仍是遠高於向下。

內地電腦業巨人聯想（00992）派中期成績表，半年賺1.31億美元，較基數極低的○九年，大升2.54倍，每股盈利1.38美仙，中期息派2.6港仙。拆開兩季，聯想第二季營業額及純利分別為57.6億美元及7,650萬美元，較首季升12%及40%，管理層歸功於業務組合轉向策略，針對中小企業、消費產品，以及發展新興市場的計劃成功，新興市場季度銷售錄得31%增長，高於成熟市場的13%，以及內地的5%，也令毛利率開始回升，由首季的10.2%升至10.3%。

後市表現繫「樂Phone」

不過，聯想狂谷的3G手機「樂Phone」，受原部件短缺影響，第二季只賣到12萬部，要炒3G手機，以及未來的便攜多媒體Talbet概念，看來仲未係時候。

綜合大行預測，聯想到明年三月底止全年賺2.67億美元，一二年升至3.93億美元，相當於18.2倍市盈率。睇番過去五年，聯想估值中位數係21.2倍，中資股之中唔算貴，唯獨行業周期性明顯，市場很難給予太誇張的估值，現價反映大約一年後業績，都算合理，不過值得留意嘅係，六至九月期間公司在4.11至4.6元之間進行回購，管理層畀晒貼士大家邊個價抵買。筆者認為5至5.5元已經值得入貨，至於未來可能刺激股價的因素，則還是要看「樂Phone」銷售表現會否有長足之進步。