股海實戰： 聯通蓄勢升穿下降軌

人行調高銀行存款準備金率，而內地十月份CPI同比增幅一如預期超過4%，達到4.4%，意味着內地通脹升溫，但股市已預先反映呢啲消息，故昨日見內地A股未有大散，反而滬綜指一度高見3,186點，收報3,147點，升32點。

究竟人行收緊「水喉」嘅力度會有多大，仍有待觀察，但阿莊有感A股市底偏強，加上時近年尾，市場氣氛暢旺，除非中央刻意出招推冧股市，否則A股應可保持反覆向上格局。

至於港股，恒指昨日亦現反彈，全日高位24,887點，收報24,700點，升199點，大市成交增至1,227億元，事關友邦保險（01299）於昨日收市後納入MSCI指數成分股，此前基金入貨，見友邦股價一度掃高至掛牌以來高位24.6元，收報24.45元，升幅3.6%，全日成交達到146億元。

內地十月份汽車產量達到159.3萬輛，轎車產量83.7萬輛，今年全年汽車產銷量勢必再創新高，而以目前汽車股嘅估值而言，投資市場預期，明年汽車產業將繼續獲得國策嘅護蔭。

講開汽車股，阿莊推介過嘅吉利（00175）、華晨（01114）及長城汽車（02333），股價經已飛晒天，如今價位太大，未必合炒作胃口，退而求其次，慶鈴汽車（01122）3元關前食一浸貨後，有條件再開快車，可以密切留意映期。

電力股未宜撈底

內地十月份發電量3,329億千瓦時，按年增長5.9%。喺近季股市升浪中，電力股沒有參與嘅份兒，皆因煤價回升，令成本壓力增加，再加上有關部委對部分製造業實施嚴格嘅限電限產令，亦影響工業用電力需求。喺內地通脹壓力上升下，中央對於電費上調速度嘅取態亦不明朗，但幾可肯定嘅息口上升趨勢，卻令電企利息支出增加，電力股弱勢有因，唔建議入市撈底。

昨日推介嘅神州數碼（00861）表現唔錯，高位曾見17元，收報16.96元，升7.34%。阿莊亦忍唔住手以平均價16元追入3萬股，但考慮到手持現金水平太低，而且已持有上實（00363）同系嘅上實城市開發（00563），故昨日以平均價37元沽出上實2萬股，套現73.4萬元，獲利約1萬元。

繼續講紅籌股，呢期聯通（00762）股價表現落後，昨日終見異動，一升就4.5%，收報11.44元，成交4.22億元。

愈來愈多消費者使用智能手機，勢必帶動電訊商嘅數據及其他增值服務業務，蘋果iPhone喺內地搶手，缺貨情況仍然持續，聯通更食正iPhone潮，今年業績應該會有唔錯表現。其股價九月見五十二周高位12.22元後反覆回落，至11元邊現承接。昨日股價重上50日線樓上收市，短線若能突破上月高位11.72元，可確認扭轉下降軌趨勢，新高可期。

戰報

神州數碼（00861）

阿莊尋日推介的神州數碼，輕微高開後便反覆上揚，並創17元一年新高，以低位15.9元計，單日升幅近7%。

信義玻璃（00868）

姚午齊尋日推介的信義玻璃，在強勁買盤支持下，一度升上6.5元，創一年新高，以低位5.97元計，單日升幅近9%。