恒生組隊上海慈善跑
下個月喺上海舉行嘅馬拉松，大家可能會見到唔少熟悉嘅臉孔，點解？因為恒生銀行（00011）組成咗一個30人嘅團隊參賽，恒生中國行政總裁薛關燕萍仲會親自落場，參加當中嘅「健康跑」，實行同員工拍住上。薛太平時有做開運動，閒時鍾意打高爾夫球，「健康跑」難唔到佢。
除咗薛太，當然唔少得恒生嘅長跑好手，即係佢哋嘅助理總經理張樹槐（Walter）啦！自○二年開始，八年間Walter已經參加過25次馬拉松，年中先啱啱喺美國波士頓跑完，接住又參加今次上海嘅全馬賽事。
員工參賽恒生捐錢
太子問佢會唔會怕天氣凍影響表現，佢話之前都試過喺攝氏8度跑過，依家一直有訓練，仲將今次目標定喺四小時內完成添。
太子知道，除咗富有團隊精神外，今次恒生嘅參與仲好有意義，因為每個參加全馬賽事嘅員工，恒生相應會捐1,000元人民幣出嚟，參加半馬嘅都有500元，所得款項會作慈善用途。恒生支持運動之餘亦不忘慈善，到時太子都要幫手打氣先得。
恒生薛關燕萍會親自落場，參加慈善「健康跑」。