樓市年底隨時有驚

美國政府再次大規模咁開大水喉，唔單止港股連日升個不停，就連樓市，都已經feel到熱浪湧緊埋身。除咗發展商「拿拿臨」催谷新盤之外，投資者同埋用家亦都積極咗唔少，皆因大家都「領教」過，熱錢湧入樓市嘅時候，嗰種威力唔係政府措施或者其他個人期望可以阻擋得到，所以大家都寧願加快腳步，希望趕喺熱錢到埗前入市，捷足先登。Paul少估計，今個月啲大型屋苑嘅二手成交隨時有機會突破六、七月嘅高位。

其實今年到依家，樓市嘅成交宗數，已經突破咗上年全年嘅數字，就算係以往被視為「另類市場」嘅二手居屋，成交量亦都已經貼近1萬宗；近排細價樓大旺，成交量更加直線上升，如果最後呢兩個月，熱錢流入谷起個市，分分鐘埋單計，全年去到16萬至17萬宗都唔係咩奇聞。

股市賺錢換樓升級

不過，雖則話資金流入，預計樓市會開始上衝，但Paul少亦都相信，樓市未必會有咁快就去到「戲肉」，隨時高峰會喺一啲大家估唔到嘅日子裏面出現。尤其係十二月尾聖誕節至明年一月尾呢啲傳統樓市淡季，先至係「唔聲唔聲，嚇你一驚」嘅日子。何解？箇中主要原因，其實Paul少喺早幾個禮拜時，都已經同大家分析過。現在股市興旺，無論係專業投資者，同埋有多餘錢投資嘅中產，呢一刻都會傾向專注喺股市度搵錢，當佢哋喺股市度搵到快錢，自然會考慮upgrade住屋，成為一股中產upgrade潮，而且美國放水，熱錢嚟到香港嘅樓市，大戶首選嘅，仍然會係一啲高端至中高端嘅物業，至於個mass market，熱錢滲入速度會比較慢，反而本地用家、投資者，或者係嚟香港「買慣買熟」嘅內地客，就往往會比較快速咁投入市場。

細價樓表現續亮麗

按照依家情況推算，Paul少相信，今個月表現最亮麗嘅仍然會係啲新樓盤同埋細價樓。不過，當細價樓業主見到個勢咁強，紛紛反價嘅同時，中產upgrade潮亦都會漸漸白熱化，呢個進程可能需時一至兩個月，所以Paul少才會覺得，今年樓市傳統淡季隨時會有「驚喜」。當然啲新盤嘅開價同銷情，亦都會左右到呢兩個月嘅市況。不過，Paul少唯一仍然擔心嘅，唔係啲熱錢唔到位，反而係啲發展商會對熱錢嘅「流量」有過分憧憬，令到開價亦都過於進取。