太子手記：上交所當機追究到太空
上交所嘅交易系統尋日朝早出現技術性故障，有成個幾鐘數據大塞車，啲買賣盤都要延遲收單，搞到內地證券公司頭都大埋。對於系統故障嘅原因市場亦都眾說紛紜，太子聽聞，有券商直情將問題「升級」去到宇宙層面，話係因為太陽黑子活動影響到訊號接收，先至搞到系統故障。
因為系統故障，上交所喺十一點半發通告，要停晒所有ETF嘅申購同贖回，直至下個禮拜先回復正常，啲券商都投訴話，朝早有好多股票買賣交易都成交唔到，搞到啲客吵住要求賠錢。對於今次故障，有人傳話係上交所撮合主機發生問題，都有人估係太陽黑子活動惹禍。
月底引進高速系統
太子八到，上交所會喺二十三日推出一個每秒可以處理8萬筆交易嘅新系統，正式代替現有交易系統投入運作。上交所已經決定，如果換系統時再出現故障，令交易無法正常進行時，就會採取停市措施。