市場徐想：放水效應 衝港交所
真係估佢唔到，上個星期全世界睇淡，但一個好嘅數據加上「放水」在望，又一次令股市沖天飛。有朋友電郵問我，個市咁高應唔應該入市，我就話有賺嘅可以鎖定一部分錢，剩番可以透過買期權或者窩輪作最後衝刺。不過，因為市場波動性較大，買價內證會相對划算，起碼「引伸波幅」呢樣嘢影響較細，容易推算後市攻略。
內需係筆者今季嘅主題，喺呢個主題下搵股勝算較高。至於有潛質嘅新股，例如四環（00460）同友邦（01299）都要跟蹤，因為盤路正確，概念又夠強，不過講快，四環會快啲，因為「價細」易舞，友邦就肯定係各大指數嘅「明日之星」，擺喺度「放長線，釣大魚」適合啲。
「放水」已經係不爭事實，亞太股市肯定係其中一個贏家。放水之後，有一個叫做「半年效應」，市場一般喺半年後再度飛升，加上港交所（00388）一連串策略性行動，衝！