股海實戰： 資源價看升 福山追得過

美國聯儲局一如預期維持息口不變，並推出第二輪量化寬鬆措施，額外斥6,000億美元購買政府債券。

講白啲，美國政府所謂嘅「強美元政策」早已名存實亡，讓美元不斷貶值，變相由全世界來付鈔替美國還債。可見二十一世紀嘅國際遊戲，何須核子彈？一部印鈔機搞掂晒！

如今睇嚟，十月初開始，內地A股不斷翻高，繼而港股飆升，相信正係一班洞悉政策方向嘅美資大鱷飲頭啖湯所為，依家擺明要谷晒啲熱錢入新興市場，眼白白睇住大浪湧埋嚟唔做嘢，亦非市場中人所為。至少阿莊相信，目前仲係處於相對安全嘅水平，真正危機可能會喺明年才出現。

講番大市，恒指升穿24,000點關後，頭也不回，昨日高見24,550點，收報24,535點，升390點，大市成交進一步增至1,201億元，話唔定呢轉要升到上24,900點水平，先至會有較大阻力。總而言之，即使係大升市都有其波幅，短炒食胡係天經地義，因應游資動向改變組合持股亦唔係問題，最重要係記得倉底唔可以完全冇貨，驚就用部分利潤坐貨，免得要落場高追失方寸。

阿莊上月買入嘅滙控（00005）終於有運行，昨日高位85.7元，收報85.5元，升3元。老實講，喺恒指成分股之中，滙控表現相當落後，睇吓年尾前可唔可以釣到條「紅衫魚」返嚟！

另一隻更令阿莊感到滿意嘅持股係中國南車（01766），昨日突破9元關，高位9.22元，收報9.11元，升5.4%。今年三月阿莊首次買入中國南車，股價一直反覆，至近季才爆升，但期間阿莊冇改變睇法，反而喺九月再加注，再次證明睇準潛力股就要信自己，認為走對方向就要全力出擊。如今目標既已實現，都要留啲水尾畀人賺，正睇位落車。

中芯或有集資需要

至於帳面上仍然錄得虧損嘅中芯（00981），有追開本欄嘅都知，呢批貨係用年初炒中芯獲利嘅資金買入，只係抱着「免本」坐貨。中芯第三季度業績虧轉盈，賺3,000萬美元，投行大摩亦不得不調高其目標價，但亦只係由0.34元調高至0.37元，事關擔心明年資本開支回升，中芯可能要再集資。

一家積弱已久嘅大企業，用一、兩年時間能夠轉盈經已係好唔容易，若然要伸手集資，只要能改善資本回報，長遠嚟講亦係值得做，關鍵係應該畀機會讓全體股東參與，若然對外配售大幅攤薄現有股東權益，做法自然有欠公允。

此外，嚟緊資源價格睇升，煤炭股可留意，論走勢福山能源（00639）唔錯，昨日突破250日線5.73元，收報5.78元，升4.7%，成交增至4.52億元，乃今年四月底跌穿250日線以來，首次重返其上收市。睇位追入，目標價6.5元，止蝕位5.4元。

戰報

建設銀行（00939）

史提芬周二推介建行，當日低位7.56元，近兩日內銀股走強，建行昨日更創8.28元一年高位，累積升幅9.5%。

深高速（00548）

積奇周三指深高速吸引力勝同業，昨日創4.92元一年新高，以推介當日低位4.4元計，兩日升幅達11.8%。