杜嘉祺第一時間掃友邦
新股「集資王」友邦保險（01299）上咗市啱啱一個禮拜，撞啱個市㷫合合，日日都聽到啲股民講緊仲追唔追好，太子尋日睇聯交所股權資料，發現友邦嘅執行主席杜嘉祺（ Mark Edward Tucker ），喺第一日掛牌嘅當天，已經行動咗，吸納34.4萬股，呢個行動，畀咗信心你哋喇！
掛牌首日增持逾34萬股
杜嘉祺當日以每股平均價22.355元，增持34.4萬股，涉資769萬元，持好倉由零升至0.01%。
友邦招股價係19.68元，首日掛牌漲逾17%，去到23.05元，成績令大家喜出望外，之後嗰幾日股價都好穩定，尋日就收22.9元，單日漲1.1%，仍高於招股價16.36%，成交依然活躍，達到24億元，位列成交金額最高嘅第六名，厲害過港交所（00388）。
雖然杜嘉祺增持行動，暫時未見到大收穫，呢類高管嘅增持行動，往往都係睇好長線嘅，話唔埋一年半載就見到收穫。