金勞詹一早話見兩萬六
QE2落實，熱錢氾濫，港股狂升，大行紛紛唱好港股會見二萬九。立法會議員詹培忠一向牙擦，話佢今年三月已經睇好港股會見二萬六，金勞詹自嘲雖然佢嘅預測係過早咗，但啱喎！金勞詹果然夠寸，佢又奉勸股民要執生。
奉勸股民記得執生
詹培忠話今年農曆新年過後，佢已同經紀講 ，睇好港股會見二萬六。佢仲忍唔住寸啲所謂專家，話要做專家就唔好估錯，錯咗就唔係專家。金牌莊家果然係牙尖嘴利！
雖然依家港股未達佢嘅目標二萬六，但短期已升咗唔少，佢就奉勸股民要緊記，當街市阿叔阿嬸都講股票時，股民就要執生，但佢認為依家港股仍未去到瘋狂狀況。
港股仲有冇力再升？佢就沒有預測，只係話股市受好多人為因素影響，但預計二○一六年金融市場會有大幅波動。佢幾時做咗「神算」，連二○一六年都估到有大事發生？
佢解釋，只係因為每十年市場都有大波動，好似八七股災、九七亞洲金融風暴、○八年金融海嘯，歷史只係不斷重複。
詹培忠今年三月已經睇好港股，果真有先見之明。 (資料圖片）
