樓價返九七已到終點?

施政報告塵埃落定之後，想買樓嘅人好多都已經對政府冇乜指望，諗住班高官「可以做嘅都已經做晒」，就算畀佢哋再有乜嘢招數，嚟嚟去去都係嗰幾味。所以大家亦都開始「面對現實」，趕快入市，令到近排藍籌屋苑狀態勇猛咗好多，Paul少相信，去到十一月上旬，個市依然都會保持到依家嘅熱度，至於會唔會有進一步嘅突破，就好睇啲新盤成績同埋股市走向喇。

各類買家爭相入市

早兩日Paul少專登走去搵東九龍班代理friend飲茶，諗住趁大旺市未嚟到，佢哋得閒啲可以同Paul少傾吓偈，點知向來逢請必到嘅「德福王子」Philip兄，就因為要帶住班下屬去「跑數」而甩底。

佢仲話，其實喺早排施政報告啱啱公布前後，佢哋已經「嗱嗱聲」做定「前期工作」，準備等十月尾開始出現嘅旺市，殊不知啲客自己都等唔切，喺施政報告之後就已經「蒲」晒頭出嚟，結果喺一個禮拜唔夠，淘大花園已經做咗四十幾宗成交，相等於整個月成交量嘅六成幾，真係做到飲杯水都冇時間。

事實上，拜政府點都唔肯復建居屋所賜，近排中小型住宅市場又再火速熱起嚟，而且更有數據顯示，中小型樓亦都去返「九七價」。繼好多豪宅返到「家鄉」之後，就連好多中小型樓為主嘅大型屋苑，同九七年高峰期嗰陣嘅樓價相比，亦都只係一步之遙。

不過，Paul少成日都想問一句「返到九七又如何呢？」難道返到九七價，就代表樓市已經去到終點？還是代表樓市的泡沫已經等同九七年嗰陣咁勁？

低息環境非同昔日

正所謂此一時，彼一時。今時今日，本港樓市形態同埋周遭嘅環境，同九七年相比亦都有好大分別，起碼當時並唔係依家嘅超低息環境，而內地資金嚟香港買樓嘅心態同經驗亦都好唔同。仲有當時仍然有居屋、夾屋呢類資助房屋，去照顧一批購買力好marginal嘅置業者，但係依家呢一類買家，都湧晒出嚟二手市場。所以，依家推動樓市火速向上嘅，並唔係單純只係班「炒樓一族」。既然係咁，大家又何必太過着眼於樓價是否已經返到九七年呢。

雖然經過九七年一役，係好多香港置業者嘅夢魘，甚至係改變咗佢哋下半生，但係咁樣並唔代表樓價嘅走向，一定要以呢個傷痛時刻作為指標；始終，樓價係唔係見頂，要考慮嘅係現在多於過去，歷史會循環不息，但總唔會每一件事都一模一樣嘛。