張化橋新書有星級粉絲
有「民企之父」之稱嘅張化橋，其首本著作《投行分析師的叛逆宣言》終於面世啦，下周一仲會搞個新書發布會。
「民企之父」作風敢言
當日亦有唔少「明星級」嘉賓到場支持，好似「星級分析員」陸東、恒生總經理馮孝忠等等。咁多財金界猛人，太子實去捧場兼拎親筆簽名啦。
眾所周知，張化橋因為踢爆歐亞農業黑幕及創立民企指數，加上敢言作風，所以獲得「民企之父」稱號。
另外佢領導嘅研究團隊更被著名雜誌《機構投資者》連續五年選為「最佳中國研究團隊」，實力果然強橫。張化橋曾經中途出家，離開瑞銀加盟深控（00604）做高管，○八年又重返瑞銀做董事總經理兼中國投資銀行部副主管。
而今次呢本新書亦係張化橋加入財金界十七年以來嘅第一本書，內容仲十分豐富，除咗會詳述投行分析員嘅盲點之外，仲會講吓黃金投資法則和優質選股法則等，太子覺得唔睇就真係走寶啦。
另外，張化橋仲會將呢本書嘅所有稿費，捐番畀母校湖北省荊門縣馬良中學，名副其實善心爆棚。