馬化騰住房補貼捐慈善
騰訊（00700）CEO馬化騰前幾日陷入「補貼門」，事緣身家近300億元嘅佢被發現接受深圳市向專才頒發嘅住房補貼，而被內地網民群起攻之，已經有靚樓住嘅佢做乜仲要攞住房補貼。畀人鬧咗幾日，馬化騰終於開腔回應，話會將得到嘅獎金用於慈善用途。
獲發補貼 網民狂插
前日深圳市人力資源和社會保障局，公布咗高層次專業人才第三季度住房補貼擬發放名單，馬化騰同金蝶（00268）主席徐少春均榜上有名，結果惹來熱烈討論，好多網民質疑《福布斯》中國富豪榜排第九嘅馬化騰，同埋據估計身家21億元嘅徐少春做乜攞3,100蚊人仔嘅補貼。
事發兩日，大家愈講愈興起，甚至有人大罵「荒唐可笑」，質疑政府「劫貧濟富」。馬化騰一路都冇回應，騰訊公關部就發表聲明，話馬化騰一直都將獎金用於慈善用途，之前獲得嘅深圳市長獎100萬元獎金都捐咗畀慈善基金，今次得到嘅房屋補貼亦會按照同樣方式操作。言下之意即係會捐咗佢。太子見馬總捐晒啲補助，即刻打去問徐總，睇吓佢點處理啲補貼金，不過截稿前，仲未得到回覆。