Fundman睇市：比亞迪 預備子彈接貨

近期不厭其煩地話，愈近QE2（二輪量化寬鬆）的公布日期（其實係咪下周三FOMC公布，大家都係估估吓）愈要小心，始終接近兩個月時間，乜消息都消化得九九十十，大市隨時高台跳水。尋日港股一跌就436點，收23,164點，若非善忘，應該仲記得港股以九牛二虎之力，才突破23,099點的海嘯後高位，好友諗住阻力變支持，點知一個轉身就碌番落嚟，收市指數距離只得不足百點，危矣。

綜觀整個大環境，情況的確麻麻，四小龍的南韓，剛公布第三季GDP得番0.7%增長，比第二季嘅1.4%，打咗個五折，睇好亞洲新興市場無懼歐美經濟拖累的，心裏涼了一截。再睇吓人民幣中間價，兌美元尋日跌超過200點子，去番6.6830的兩個半星期低位，炒人仔升值的都無戲唱。值得留意，係美元都有死貓彈迹象，近日美匯指數跌到76水平附近已經唔肯再跌，尤其逆轉走勢係在美國財長蓋特納見完國務院副總理王岐山之後發生，到底美中之間會唔會私底下就匯率問題傾掂咗數，局外人得個估字，但從種種蛛絲馬迹所見，中國與亞洲多國要做逆市奇葩，無視環球經濟氣候的憧憬，看來市場是賭得太大太樂觀，短期股匯市調整相信經已展開。

40元支持受考驗

獲股神巴菲特關照的比亞迪（01211），差強人意的第三季業績曝光後，股價止唔到瀉，前日急跌一成之後，尋日再跌近9%，短短兩日市值蒸發咗240億元。傳媒昨遇到有中國女股神之稱的西京投資主席劉央，自然問吓佢意見，估唔到劉央又肯答，認為去到40元水平會有支持，到底係口噏噏定係真知灼見，以比亞迪跳崖式向下的走勢，相信幾日之後隨時會有答案。

早前股神聯袂微軟主席蓋茨訪華，游說內地富人捐身家，兼順道參觀比亞迪廠房，一度令比亞迪股價急升，由45元水平升到接近65元，估唔到幾個起落，又打回原形，筆者仲諗住比亞迪相對其他汽車股溢價較低，有換碼的價值，結果教訓是便宜莫貪。

講番今次業績，第三季賺得1,130萬元人民幣，同首兩季所賺的24.33億元人民幣一比，縮水程度認真嚇親人，一來係新舊車款交替期，八月及九月份舊一款汽車銷售連跌兩個月，而且早前被指違法佔地被罰兼沒收七幢廠房，都响季度成績表上踩多一腳。

股神態度成關鍵

大摩報告認為，季節性因素的影響，在第四季應該完結，配合新車款面世，銷售會回升，其修訂後的一○及一一年純利，分別為34.95億元及59.48億元人民幣，以尋日股價46.5元計，預期市盈率分別為25.7倍及15.1倍。到底比亞迪股價何時見底，關鍵在於今次低於預期的業績屬一次性抑或持續性問題，大摩分析員的睇法應屬前者，但史提芬認為股神會否加入沽貨，才是最舉足輕重的考慮因素，尤其推薦他入股比亞迪的李祿，已退出接掌巴郡的候選名單之列。

比亞迪在巴菲特入股前估值中位數大約為15.7倍（7.4至24倍），現在看來調整應已足夠，但這類洗倉往往沽過龍，或許真如劉央所料，有見40元的可能，屆時一一年PE大約十三倍，一直想與股神坐同一條船的，可以預備定子彈了。