股海實戰：東瑞製藥 續有炒上空間

即月期指結算日前，港股出現較大幅回吐，恒指一度低見23,148點，收市報23,164點，跌436點，大市成交增至987.1億元。似乎喺重大消息前夕，部分投資者選擇先行減磅鎖定利潤。

不過，芬佬線人向阿莊報料，今次股市有排升，至緊要有貨喺手咁話，究竟係堅料定肥田料，阿莊選擇信自己對眼，暫會按兵不動，觀察22,800至23,000點水平承接再作打算。呢位芬佬線人又話，現時芬佬嘅部署係逐步趁高減持內需股，轉為低吸內銀、保險以及資源股。睇咁嘅形勢，若然今浪港股只係短期調整，要檢討組合持股，可留意資源及內險股嘅機會。

環保汽車龍頭企業比亞迪（01211）因季度業績欠佳引發沽壓，繼前日股價急插一成後，昨日再跌8.9%，收報46.5元。投行瑞信更揚言，比亞迪股價潛在跌幅達35%，故給予跑輸大市評級。

正所謂「一沉百踩」，做人如是，股票亦如是，但對於實力投資者，別人恐慌時，正好提供出擊機會，喺美國股神繼續捧場嘅大前提之下，是次跌浪回到40元邊，又可以考慮人棄我取。

講到新能源股份，第十二屆中國國際高科技成果交易會將於十一月十六日起喺深圳舉行，聽講屆時會有好多新能源企業參與，應該亦會有唔少相關產業發展嘅消息出現，此前相關股份若現超賣，話唔定係低吸機會。

四環登場藥股贈興

四環醫藥（00460）今日掛牌，執筆時聽聞暗盤價已較招股價高出兩成，相信今日肯定為股市焦點。除此之外，昨日亦見有游資趁機吸納一眾藥業股，博四環炒得瘋狂，帶動整體藥業股估值提升，故見銘源醫藥（00233）逆市升4.85%、利君（02005）升1.1%、中國生物製藥（01177）升3.5%、神威（02877）及廣藥（00874）分別升4.8%及4.3%。正所謂有智慧不如趁勢，跟炒藥業股，可考慮東瑞製藥（02348）。

東瑞主要從事製銷醫藥產品，包括原料藥、粉針劑及固型劑業務，今年上半年實現收入6.26億元（人民幣．下同），同比增長26%，純利8,750萬元，增長71%；毛利率同比上升3.1個百分點，至31.9%。

參考去年度，公司下半年業務較上半年佳，保守估計今年下半年度表現僅與上半年持平，即現價預測每股盈利約0.22元人民幣，預測市盈率14.9倍，照計咁嘅估值，應該仲有炒上空間。

再睇股價走勢，九月份股價急升，成交大增，本月上旬開始進行整固，昨日曾高見3.66元，收報3.64元，升5.2%，成交1,549萬元，初步睇3.3至3.5元水平有承接，若今日升勢可持續，按預測市盈率十八倍計，目標價4.3元，止蝕3.3元。

戰報

銀基集團（00886）

史提芬十月七日建議買入嘅銀基昨日發盈喜，股價最高升至6.18元，較推介當日低位4.35元，升幅逾42%。

通天酒業（00389）

阿莊喺十月五日推介通天酒業，昨日逆市做好，最高曾升至2.4元，較推介當日的低位2.09元，累升逾14%。