友邦明掛牌猛人齊集
「巨無霸」友邦保險（AIA）（01299）明日喺香港上市，通常呢啲大公司上市，出席上市儀式嘅嘉賓都會大陣仗啲，直情可以用粒粒皆星嚟形容。太子聽聞，AIA會率領一班高層出席，包括AIA執行主席杜嘉 （Mark Tucker）、AIG行政總裁本穆沙，至於係AIA代表人物嘅名譽主席謝仕榮同非執行董事蘇澤光，及出名多計嘅獨立非執董許仕仁等，亦預期會出席。
僱員網上認購佔90%
另外，港府同港交所高層代表，包括陳家強及夏佳理等都會出席，可見香港對呢隻「巨無霸」上市有幾咁重視。
的而且確，AIA今次上市真係創造咗不少歷史，除咗打破香港嘅集資額紀錄外，亦首次為員工優先認購採用粉紅表eIPO。
喺1,800多名合資格僱員中，有逾1,300名僱員認購，其中有九成採用咗網上認購，所以都可以講AIA係本港最「先進」嘅公司，因為有咁多「Hi Tech」員工呢！計太子話，應該頒個獎畀佢哋呢！
經紀方面，有5,000至6,000個經紀共申購逾2,960萬股，當中逾四成嘅「一級代理」利用粉紅表eIPO，逾六成嘅「二級代理」利用粉紅表eIPO。