彤叔三爺孫齊賀京新店
新世界（00017）主席鄭裕彤經常中港兩邊走，最近又去咗北京一趟，今次嘅意義都相當大，皆因彤叔旗下嘅周大福，喺北京開設佢哋全球最大嘅旗艦店，亦係佢哋第1,000間分店，所以三爺孫都有出席開幕禮。
周大福開最大旗艦店
呢間旗艦店坐落喺北京有「天下第一街」外號嘅北京崇文區前門大街，由兩幢各擁四層嘅珠寶和鐘錶旗艦店所組成，總面積超過28,000平方呎，係佢哋目前在亞太區面積最大、產品最齊全嘅店舖。據講，呢條街已有570年歷史，乃明、清兩朝皇帝出巡祭天嘅御道。
彤叔話，周大福已有80多年歷史，一直秉承「真誠、永恒」呢個理念運作。
除咗彤叔，佢兩位乖孫，亦係周大福董事嘅鄭志剛同鄭志恒都有到場，當然唔少得董事總經理黃紹基，同埋一眾中港兩地嘅管理層。佢哋嘅目標，係喺二○二○年實現開設2,000間分店。
太子見成個開幕儀式，配合到新店嘅環境，糅合古典與時尚氣息，又凝聚東西方文化精髓，例如有氣勢磅礡嘅擊缶表演、小提琴演奏等。
周大福喺北京開設旗艦店，彤叔（中）親自出席開幕禮。