其實Paul少都認同，市場班用家經過咗八、九月嘅「沉默」之後，已經開始按捺不住，所以陸續都走番出嚟買樓，相信係已經預咗施政報告「冇乜料到」。

強攻新盤惠及二手

Paul少更加相信，十月中旬至下旬，樓市嘅復甦期會進一步加快，除咗係好多市場嘅疑慮到時已經釋除咗之外，內地客再次喺市場活躍，亦都係市況嘅催化劑。事實上，喺「十．一」長假期，內地進一步打壓樓市，資金計劃「買磚頭」但苦無出路，多少已經令到好多內地客轉攻本港樓市，雖然今次佢哋嘅「火力」集中晒喺新樓盤，對二手市場嘅效應唔係咁大，但帶動整個樓市氣氛，就連二手市場都感受得到。

事實上，Paul少已經不下一次講過，內地客嚟香港買樓，將資金投入本地，已經成為咗樓市嘅一部分；尤其係香港長期處於一個低息環境，借錢買樓嘅成本比內地低好多，內地客就更加鍾意落嚟投資。

其實喺早年，內地樓市嘅升浪比起依家香港更洶湧，內地政府大力興建經濟適用房，但仍然未能夠令樓市退熱，最終要一次又一次咁施以調控政策先稍為歇息一下，講到底都係因為內地經濟發展快，人民對房地產嘅需求大，令到磚頭有價；而投機活動自然亦都大增，進一步推高樓市。

本港因素遠勝內地

所以，雖然有中央政府出手打壓，但係既然利好嘅基本因素仍然存在，內地嘅房地產市場始終會唞一陣後又再升過。

同樣，好多內地投資者都會將呢套投資房地產嘅經驗同邏輯帶嚟香港，佢哋堅信，只要低息環境仍然存在，經濟繼續向上的話，就算香港政府話要復建居屋，都唔會影響樓市升勢。如果政府又出招，佢哋最多揸住啲貨「抖一陣」，總唔信香港政府嘅招數，可以「狠」得過「阿爺」。

Paul少相信，如果要內地人嚟香港買樓嘅趨勢出現結構性逆轉，除非香港嘅樓市無論係相關政策、借貸成本，或者係交易透明度、自由度，以至係物業嘅品質等方面，都逐漸變得比內地環境差，咁就有可能令到內地客將「買磚頭」嘅資金轉移返內地，但係，問心嗰句，真係有咁嘅可能咩？