「十．一」長假後，A股今日復市，預咗會追番外圍裂口開高，到底港股會否借勢突破23,099點海嘯後高位？抑或來個反高潮趁A股高開回吐？不妨睇睇安碩A50中國（02823）表現。由九月三十日至尋日為止，內地長假期間這隻指數市場基金（ETF）由12.4元升到12.74元，相當於A股今日要開高2.74%，即滬綜指會由假期前的2,655點，升72點去到2,727點。
當然，股市永遠唔係一加一等於二咁簡單，否則個個發達。A50屬於追隨指數的基金，同盈富（02800）一樣，分別只係A股唔係人人有配額買到，要買就要畀額外「入場費」，故一直有溢價出現，尋日A50較指數溢價創咗今年新高，達14.2%，比過去半年介乎5至13%高出一截，搵個中間位，大約9%，咁A股要追番升幅的話，升幅將會介乎2.74至5.2%，即係最多可升138點，但話分兩頭，5.2%「大高水」，自然惹來一眾大孖沙食指大動，值得留意。A50尋日無論沽空股數抑或佔總成交比重都創咗新高，4,975萬股沽空，等於總成交1.19億股的四成二，似乎睇好睇淡會有一場龍爭虎鬥，今日入市前，不妨睇睇A股點開至做決定。
估值重回吸引水平
家電股除海爾（01169）外，近期大市升浪中都算靜局。去年市場炒中央補貼、家電下鄉，令家電股成為○八年及○九年的明星股，但今年卻大為走樣，皆因市場開始意識到政府唔會永遠補貼國民去買家電，傾斜的政策總有完結一日，像TCL多媒體（01070）及創維（00751），今年分別跌58%及32%，但近期睇番，家電股估值已大幅回落，返到去平易近人的水平。內地消費動力依然強勁，而且和其他內需股大幅飆升的估值相比，家電股開始重現吸引力，距離復活之日應該唔遠。
事出必有因，TCL跌得咁殘，一來是去年炒家電下鄉炒過龍，同時，中期業績將管理層差勁的生產計劃徹底暴露，庫存嚴重，加上「歐豬」問題令歐洲出口大跌，以及重組LCD電視的OEM業務都未見成績，結果中期蝕掉3.34億元，去年十月才上任的CEO于廣輝引咎請辭，舊人趙忠堯重掌核心營運。
逆境求生故事動人
上半年失地太多，一○年業績已不能抱有期望，但管理層透露，去年積壓的舊款液晶電視，第二季已成功出清庫存，下半年業績應該可以扭轉虧損局面，綜合大行預測，全年賺6,271萬元，意味着下半年追番近4億元利潤，是否太樂觀見仁見智，而一一年預測盈利則為3.33億元，市盈率9.6倍，稍高於創維的九倍，但股市中逆境求生的故事通常最動人，而且以TCL出問題前平均六至十八倍的估值，現水平應該仲有相當大的炒上空間。