阿莊喺60元水平經已話要睇位買入和黃（00013），但一直沒有行動，結果恨錯難返，真係抵鬧！講開和黃，母公司長實（00001）再獲大股東增持，反映大股東對集團前景信心爆棚。事實上，和黃股價經已沉寂好幾年，如今前景陰霾消除，獲大行重估，相信傳統基金買貨潮尚要繼續一段時間，較理想係等回試70元關承接，再考慮追貨。
康師傅有得炒落後
內地長假期間消費市道暢旺，食品、零售行業成受益者。王朝酒業（00828）昨日榮登升幅榜，全日高位5.62元，收報5.29元，升17.2%；而阿莊喺本周二推介嘅通天酒業（00389），昨日再創上市新高2.32元，收報2.21元，升5.7%。其他食品股，旺旺（00151）及統一（00220）近期都錄得不俗嘅升幅，唯獨康師傅（00322）表現落後，相信與價位較大炒作成本較高有關，但阿莊相信，基金遲早都會動手炒一轉。
黃金價格勢如破竹，金礦股身價水漲船高，靈寶黃金（03330）股價昨日再升9.4%，真係犀利！事實上，質素較佳嘅招金礦業（01818）股價唔經唔覺上到26元樓上，難怪靈寶都要急起直追。
同樣係從事有色金屬業務嘅新疆新鑫礦業（03833），昨日股價創五十二周新高，收報5.16元，升1.7%。睇呢隻股近兩日成交才開始增加，且已突破去年中以來嘅下降軌阻力，照計仍有操作空間，食得唔好嘥！
重點產業輪流落鑊
本月中內地將召開五中全會，據講內容將放在「十二．五規劃」。每個涉及內地長遠規劃嘅議案，內容都不會少得有關「三農」嘅篇幅，相信今次亦不例外，故見昨日個別農業股有買盤追捧，第一拖拉機（00038）曾高見6.96元，收報6.95元，升8.09%，成交達1.08億元。另外，圍繞七大新興產業，新一代訊息技術乃其中之一瓣，從事電訊相關支援服務嘅中通服（00552）應可從中受惠。
講到中通服，查實阿莊喺七月份已叫大家冷敲呢隻股，當時股價才3.8至3.9元，結果九月初開始爆升，一直沿10日線向上，昨日收市報4.69元，乃五十二周收市新高，全日高位亦平了上月高位4.7元。阿莊相信，在結束為時兩周嘅整固之後，呢隻股又再整裝待發，下一目標上試5至5.2元區域，買貨有心唔怕遲，初步支持喺4.4至4.5元。
戰報
中國稀土（00769）
史提芬周三指中國稀土受惠國家重整稀土產業架構，股價昨日創3.92元上市新高，較周三低位3.46元升13.29%。
中新地產（00563）
阿莊本月四日指中新地產於上海房地產市場具發展優勢，股價昨日高見3.92元，較推介日低位3.47元，累升12.96%。