本文重點
最近新股勁多，但講起新股，舊年底上市、兼且獲得多位猛人入股撐場嘅幻音數碼（08248）尋日喺聯交所申報其中一位大股東嘅持股量由22.57%去到0%，即係沽貨走人。呢位大股東，就係已故「股壇怪傑」香植球嘅第四仔香立智，咁邊個係收貨人呢？
香立智沽清持股
資料顯示，响香立智出貨嘅同日，原本持有公司百幾萬股嘅伍步謙亦申報增持公司權益，股數同香立智減持嘅一樣，以每股作價0.465元計，交易全額6,532萬元，持股量去到22.82%。
特別嘅係，伍步謙喺九月底時「因須為個人事務投入更多時間」，一口氣辭晒公司嘅獨立非執行董事、審核委員會及薪酬委員會成員及薪酬委員會主席，生效日期係十月二日，即係佢申報增持日之前三日，公司發言人話呢單純粹係股東嘅交易喎，仲話伍步謙應不會參與公司營運咁話。