Paul少預期,就算十月份樓市嘅成交唔能夠即時增加,但市況應該都會比之前較為明朗啲,對於釋放近兩個月積累落嚟嘅市場購買力,都有明顯幫助。
偷步入貨博賺一轉
其實,近呢兩個禮拜,雖則話樓市交投依然冇乜起色,但係投資者「靜靜雞」入貨嘅個案,唔覺唔覺多咗,尤其係一啲本地用家追捧嘅熱門大型住宅區。早兩日,Paul少同駐守將軍澳嘅譚區董食飯,佢話近排開始多咗啲大陸豪客轉戰將軍澳,專掃啲優質海景戶。好似月中嘅時候,就有個內地客,連掃4個調景嶺都會馬尺,一擲就二、三千萬冇眨眼。無他嘅,皆因呢班客,好多都係炒開豪宅,二、三千萬對佢哋嚟講,只不過係「基本」入場費,當然唔會有大問題喇。
Paul少相信,內地豪客都同樣憧憬緊早排嘅「政策市」會隨住施政報告出灶而告終,市場又會重歸番「供求主導」嘅局面,本地嘅用家亦都會鬆一口氣,開始重新投入市場度搵貨,所以佢哋都揀啲用家為主嘅「細價貨」(對於佢哋嚟講係細價貨)先試一試水溫。
而且,市場都估計,施政報告對於點樣幫助小市民置業,會着墨較多,所以,如果今次升市重臨,好有機會係會從眾所關注嘅中小型物業開始爆發,現在用家都觀望緊嘅時候,正好適時吸納,所謂「藝高人膽大」嘛。
內資「九折心態」湧港
另外,譚區董提到,近排國際間對人民幣匯價嘅爭拗講到㷫合合,人民幣進一步升值嘅機會愈嚟愈大,到時好多從未涉足過香港樓市嘅內地資金,可能又會以「九折心態」湧入嚟,所以好多炒慣「港樓」嘅大陸客,都搶先佢哋班同胞,早一步入貨,希望可以趁機先賺班同胞一轉。
Paul少都相信,一旦人民幣進一步升值,唔少內地嘅「舊雨新知」都會落嚟香港投資,問題只係個timing可唔可以配合得到啫。
以往,喺呢一類上落市裏面,投資者唔聲唔聲入貨,早着先鞭,往往都係大升市嘅第一步。
雖然今年嘅情況比較複雜,內有政府屢屢出招,外有特殊經濟氣候,同埋人民幣匯價嘅問題,但只要樓市基本因素冇結構性嘅轉變,相信劇情都會係咁發展落去。