另一個令史提芬對後市信心增加的原因，係尋日睇到一份美資證券行統計，指出九月份基金經理手頭現金量比例，由3.8%升至4%，有20%基金已經增持現金比例，乃○九年七月以來新高，理由係大孖沙都擔心中國通脹未見頂之餘，第四季經濟增長仲會拾級向下，所以採取比較保守策略。股神巴菲特講過，人人貪婪，你要小心，但當人人小心，你就要學識貪婪，既然大孖沙都對後市有保留，大部分基金唔夠貨，目前大市平均估值又唔算高，只要氣氛好番啲，基金勢必急急補倉，第四季股市未可睇得太淡矣。

放大圖片

放大圖片

智能手機帶動盈利

香港人向來走在時代尖端，熱愛追逐最新電子產品，手機的更換頻率，認咗第二，恐怕都無其他地方敢認第一。下半年的iPhone、iPad熱潮，可真一時無兩，身邊朋友唔少最近都轉用，或者由舊型號的iPhone3GS升級到iPhone4。

本來香港個人電腦市場都已經相當飽和，但智能手機的普及，令互聯網及網上遊戲應用更加頻繁，君可見公共交通工具中，幾乎人人手擰一部通街上網，電訊收費也由語音為主每月付一百幾十，變成今日數百元的無限數據上網，最大得益者莫過於電訊公司，事關設備投資屬一次過，更多人用，用量更多，每戶的平均折舊成本便會相對減低。

早輪一堆公司齊齊出業績，數碼通（00315）確實走漏眼，成績曝光後，股價日日升少少，由8.2元拾級而上，去到尋日收報9.38元，累積升咗一成四。

數碼通截至六月底止全年賺咗2.94億元，同比升咗5.9倍，但未計息、稅、折舊及攤銷前盈利（EBITDA）升33%至11.82億元，EBITDA率由24.1%改善至29.9%，令人印象深刻，包括營運開支只升2%（低於營業額的6%升幅），數據收入部分，按年勁升38%，主要係去年開始提供iPhone3G及3GS的數據服務所致，服務套餐收費較高，這點從下半年ARPU（每用戶每月平均消費）開始止跌回升，可以得到印證。

值得留意的是，今年七月底，數碼通正式開售iPhone4綁式上台套餐，加埋iPad的數據使用服務，將有利每戶平均消費，出現多年來首次的止跌回升。

派息比率可達100%

數碼通市值49.3億元，本身持淨現金4.9億元，每年營運業務現金流淨額近13億元，固定投資一年只係6億元，加上香港又無大的購併目標，看來大行估數碼通明年可以更進一步，達到百分百的派息比率，並非無可能，以一一年每股派息0.54元，息率5厘計算，數碼通的合理價可見10.84元，今次升浪相信仲有水位。