本文重點
七、八十年代叱咤風雲嘅佳寧集團主席陳松青，有一段長時間在公眾場合銷聲匿迹，但為咗爭奪5件現估值過億元的宋、清古董，陳松青終於「蒲頭」，在庭上與前恒生銀行太子爺林秀峰對質，林話陳當年5件古董一借無回頭，陳就話係自己真金白銀買嘅。太子昨日就專登去法庭八吓，嘩！陳松青竟然喺庭上喊。
爭古董對簿公堂
陳生講到乜嘢咁感觸？咪就係講到佢啲女囉。陳松青話當年向林秀峰買入嘅3件古董，原本係諗住畀3個女做嫁妝同「家傳之寶」，講到呢度，就見佢抹眼淚，搞到坐喺附近嘅法庭書記小姐拿拿臨將紙巾奉上。據陳松青講佢買入古董當年，大女先得12歲。太子眼見，陳大小姐好孝順每日陪住Daddy出庭。
今次可以近距離一睹陳松青風采，都真係好難得，不過Cool即係Cool，聽講佢每次離開法庭就會除低副普通眼鏡，帶番副黑超先！然後再登上佢架黑色七人車。