話時話，六月到依家，豪宅地賣完一幅又一幅，睇到發展商對豪宅地皮嘅需求好大，但係，對個樓市嘅即時刺激作用，就似乎已經愈嚟愈細。買賣雙方對地皮高價成交所帶嚟嘅憧憬，亦都開始淡化咗好多。Paul少覺得，有咁嘅現象，對樓市嘅發展其實百利而無一害。Paul少咁講，主要都係因為樓市終於可以從過分炒作「賣地成交價」嘅困局之中走番出嚟。

須知道，豪宅地皮能夠以天價成交，除咗反映發展商對未來樓市走勢嘅預測之外，同時亦都同個別發展商嘅業務策略有關。即係話，發展商最重要都係要睇住自己嘅財務狀況，同埋手上有幾多「儲備」可以作未來發展。當發展商手頭唔係好夠「麵粉」，自然就肯畀高啲嘅價錢去買地，唔通閂埋門唔做生意咩；但係幅地溢價高咗，成本高咗，就唔代表將來啲「麵包」一定可以鎖定喺某個邊際利潤嚟賣。

樓價預測純屬主觀願望

所以，當啲市場人士成日話，將來幅地發展成為豪宅之後，推出嘅價錢起碼可以幾多幾多，其實講到尾，都不過係大家「將心比己」嘅主觀期望啫。始終發展商賣樓，開價只能夠跟當時嘅市況，同埋睇自己盤數（即係等唔等錢使），而唔係要滿足市場嘅期望囉。事實上，Paul少喺樓市咁多年，見盡好多泡沫形成，唔少都係源於市場一啲不切實際嘅主觀期望，令到小市民走向盲目嘅境地。Paul少實在唔想樓市咁快又再走入呢啲絕路裏面。

買家入市睇經濟股市

講番轉頭，既然賣地成績未必會再有咁大影響，咁嚟緊呢一季嘅樓市走向，可能就要重歸基本步，即就係睇番整體嘅經濟表現同埋股市。尤其係前者，除咗影響到整體大市氣氛之外，亦都影響緊好多公司年尾成績表，間接影響打工仔今年有幾多人工加。如表現理想，氣氛可以keep得住，大家唔使憂柴憂米，咁就算樓價貴啲，打工仔都願意入市。但如果勢色唔對，啲公司老闆就會好慣性咁「預早反應」，就算唔裁員都可能考慮凍薪。當員工feel到老闆嘅想法，自然亦都唔敢隨便投奔樓海之中，成交亦難免會萎縮。

或者有朋友會話，香港樓市依家有內地同胞支持，水源充足，應該都唔會差得去邊。對於內地資金對近年樓市嘅「貢獻」，Paul少唔會懷疑。不過，第四季內地人買樓嘅盛況可唔可以持續，或者會有啲變數，至於詳細係點諗，Paul少喺下個禮拜再同大家分享一下。