早前個計劃就舉行○九至一○年度嘅閉幕儀式，滙豐保險亞太區保險業務副主管孟學燊仲親自出席儀式，佢就話真正嘅關懷並唔簡單，就好似佢哋嘅義工咁，會不時致電問候、家訪，甚至陪伴長者參加節慶活動，照顧長者嘅情緒感受。孟學燊仲話，短短一年內，計劃成功撮合咗120對長者同義工，總共為長者服務超過3,840小時，成績非常唔錯。

儀式請咗唔少長者出席，雖然太子覺得孟學燊未必聽得明公公婆婆講乜，但見到佢哋仍然滿臉笑容，仲戴住個愛心手套同啲長者影相，嗰份關懷相信能衝破語言隔膜。所以太子非常鼓勵銀行界搞多啲義工活動，幫到有需要嘅人，亦可以打造企業形象，何樂而不為呢？