由職工會搖身一變成為專業總會，太子感覺係即刻變咗專業晒，形象立即「升呢」！唔知大家同唔同意呢？

聽聞證券及期貨業職工會改名已做晒手續，應該好快會正式正名。

業界反對縮午休

其實證券業嘅組織改名，都唔係乜嘢新鮮事，最近期就要數本地嘅龍頭經紀組織，證券經紀業協會改名做證券業協會。而證券學會嘅前身就係證券業同學會呢！

依家金魚缸最多人討論嘅其中一件事，就係延長交易時間，證券及期貨業職工會會長王國安早前就同太子講，收到唔少行家電話，反對午休縮短到只有一粒鐘，佢仲話經紀呢行壓力好大，從人道同健康立場考慮，真係需要時間休息，就算行「輪班制」亦未必咁容易實行，因為有客有生意唔通話唔做，畀第二個同事跟咩！再講，午飯時間佢哋仲要同客social，「箍客」搵生意呢，講到尾都係唔想得咁短嘅食飯時間！