前日紀勤先至喺澳洲做路演，尋日就已經旋風式返抵香港，喺會展新翼向數以百計員工舉行另一場路演，佢仲好識冧啲員工，一開口就話係「為你而來」。紀勤今次所講主題，太子就覺得同佢上任集團行政總裁以來一直提倡嘅「join up」同出一轍，意思差唔多，可能呢個新字眼更加貼切啦。

了解客戶需要

尋日喺大會上，紀勤同香港嘅員工講，集團不同市場及不同業務都要聯繫起來，彼此間要多啲轉介，對於自己做得好嘅地方就要高呼出來，換言之即係有好嘢唔好收埋，要畀人知道；仲要有勇氣接受新事物。滙豐有國際平台，客戶對國際業務興趣亦愈來愈大，當中仲唔少客戶想喺多過一個國家發展業務，係呢個趨勢下，更加要加強各地業務嘅聯繫。

紀勤仲提醒員工要認識自己嘅客戶，唔好淨係同財務總監講嘢，要多啲去客戶廠房睇吓人哋告示板，言下之意係叫員工唔好只係講數字，亦要多啲了解客戶真正需要。