本文重點
鷸蚌相爭，漁人得利，呢個故事係人都聽過，家陣一向手執中國家電零售業牛耳嘅國美電器（00493）管理層同大股東喺度大鬥法既時候，佢哋嘅強敵蘇寧電器唔單只喺業績方面靜靜起革命，已經可以同國美平分秋色，仲要喺幾日前高調咁推出股票期權激勵機制，獎賞員工士氣，穩定公司骨幹成員，可以話係現實版漁人得利嘅體現。
蘇寧期權獎勵激士氣
內地家電業朋友同太子講，今次蘇寧嘅股票期權獎勵計劃，仲全面過國美之前推出嗰個，因為只有在蘇寧工作五年以上嘅248位中高層管理員工都可以受惠，計劃佔公司股本總額約1.21%。咁筍會唔會引發國美員工跳槽潮呢？老友話呢樣就有待觀察，但可以肯定嘅係，一定會唔多唔少打擊咗國美員工嘅士氣，事關早輪佢哋管理層推出嘅激勵計劃，又畀大股果黃光裕反對，家陣仲話要開臨時股東大會改組董事會，仲要炒埋主席陳曉，形勢危峻，真係可以用四面楚歌嚟形容，如果國美管理層同大股東再唔「生性」，睇怕中國家電零售業都好快要改朝換代囉。