本文重點
致力拓展Y世代市場嘅滙豐，繼今年四月招募咗20位「Y世代大使」幫佢哋了解年輕人嘅理財需要，早排又推出專為Y世代而設嘅「Y人理財交流平台」hkYFi網站，仲請咗股評人助陣，幫個網站主持星級訪問同親授投資智慧。
網站獲2.6萬人登記
有乜嘢星級訪問？就係近期好紅嘅趙增熹、張繼聰、運動員余翠怡，同埋立法會議員陳淑莊等，佢哋會以閒談方式分享奮鬥史同埋理財心得。
Y世代係指八○至九五年間出生嘅年輕人，據知，滙豐hkYFi網站反應良好，自六月推出以來，已經有2.6萬人登記加入。滙豐香港區個人理財業務業務發展高級經理鄭嘉雯仲同太子講，過去一年，Y世代喺該行開設嘅綜合理財戶口數目按年增長達20%，睇到市場正在擴展，所以會繼續豐富呢個網站嘅內容，同埋下個月去大學舉行一連串活動。據呢位股評人講，Y世代問嘅問題有質素，關注層面唔淨係炒股。佢希望透過網站全方位為Y世代灌輸正確嘅投資理財態度。