事實上，大市成交463億元，去到接近五星期最低紀錄，可見大孖沙入市興趣唔大，看來市場要等周五美國經濟數據公布後，才有較明顯方向，今個月港股高開低收似是已成定局，期指會唔會响餘下五日轉倉時間愈轉愈低，似乎機會都唔細。

從事水泥及建材生意的金隅股份（02009）發盈喜，估計截至十二月底止全年利潤不少於26.966億元（人民幣．下同），當中包括重估投資物業公平值，提供不少於5.147億元帳面溢利。睇番去年七月上市的金隅，○九年第一份成績表賺咗20.35億元，今次雖然出盈喜，可是投資物業重估溢價，只係反映揸住嘅磚頭升咗值，並無對現金流或者實際收入有實質影響，減番條數，實質業績不少於21.8億元，比○九年大約多7.2%，雖然仲係比大行估計好些少，但相信對股價未必有持續刺激作用。

銀紙貶值揸實物

周末茶敍，幾個老友研究有乜好投資，眼見銀行簿仔零息期要比預期來得更長，樂觀嘅都要一年半載，萬一美國唔好彩來個雙底衰退，隨時持續多三兩年都唔定。

美歐日央行都話要擴大量化寬鬆，銀紙唔值錢的年代，最好係買實物投資，可惜黃金無息收，儲存又相當麻煩，唔係大家杯茶。買樓收租本來唔錯，試問今時今日有幾多生意自己出三成錢，銀行借足七成？可惜樓價已經累積升咗唔少，租金有點落後，新樓租務回報2厘唔夠，八至二十年樓都係4厘多啲啲，計埋各類雜費，同埋特區政府連番出招㩒市，並不斷向賣樓賺錢業主追稅，諗落都係制唔過。

只要資產價格上漲，住宅同商舖租金都會慢慢跟上，商場升格，吸引更多付得起錢的租戶，雖然肯定會令唔少街坊及舊租客失望，但領匯（00823）租金回報持續有改善，卻是鐵一般的事實。

TCI撤出屬利好

一度想狙擊領匯的英國對沖基金TCI，終於都全面撤出，月初在市場減持到5%以下，依例已毋須再申報，由聯交所股權資料顯示，代之而起成為策略股東的，是澳洲聯邦銀行，一直擔心TCI搞搞震的不明朗因素，總算消除。

由大行的綜合預測數字，領匯一一年及一二年的基金單位回報，預測有1.059元（港元．下同）及1.138元，以現價21.6元計，現金股息回報有4.9厘及5.27厘，高過美國國債之餘亦唔使畀稅，假如未來幾年租值跟隨通脹有較高增長，投資者同樣可以享受得到。

本來，香港有更多高於5厘回報的REITs，但上市時做過唔少財技包括利率掉期，未來回報會相對下降，要數簡單穩陣，首選仲係領匯。