本周有官地拍賣，政府選擇此前發布有關樓市嘅新措施，相信係喺面對唔少輿論壓力之下嘅舉措。基本上，有關針對一手樓花摸貨，以及收緊1,200萬元以上物業按揭嘅做法，係有好過冇，但卻未能針對解決近期中小型樓炒風熾熱嘅問題。
新政策仍難救近火
至於話嚟緊啟德會有四千個住宅單位供應市場，呢個唔係新訊息，到時咁嘅靚位置又唔知要賣幾錢一呎，更何況「遠水難救近火」。究竟如何解決涉及基層住屋需求嘅中小型樓供應問題，政府仍未有觸到癢處，咁搞法分分鐘仲逼晒啲錢去炒細價樓，到時班用家真係多得佢唔少！
但當然，有做嘢總好過冇做嘢，起碼畀市場一個明確訊息：政府高度關注樓市問題。上周五，三點後見到地產股急速回吐，拖累恒指轉升為跌，新地（00016）、恒地（00012）、長實（00001）同跌1%，美聯集團（01200）跌4.4%，且看本周賣地成績能否扭轉淡風。
中銀估值可望上調
工行（01398）私有化工銀亞洲（00349），出手都算闊綽，相信成事機會甚高。咁嘅舉動，令阿莊聯想到，中國銀行（03988）會唔會私有化中銀香港（02388）。之不過，工行私有化工銀亞洲嘅作價，不高於工行現時嘅市帳率2.4倍，反觀目前中行嘅市帳率唔到1.8倍，而中銀香港市帳率就達到2.15倍，從呢個角度睇，對中行而言，即使有意，目前亦唔係合適時候。
講開中銀香港，上周五股價逆市上升，高位見21元，收報20.95元，逆市升3.7%，成交4.59億元。人民幣加快國際化進程，香港將擔當積極角色，中銀香港憑着股東背景優勢，將會成為得益者，現價往績市盈率十六倍，息率4厘，若八月廿六日宣布嘅業績勝於預期，估值具上調空間。
另一隻即將宣布業績嘅紫籌股係華潤電力（00836），下周一將宣布中期業績。最近大摩亦就內地電力股發表報告，對潤電嘅評價正面。
事實上，潤電主營業務喺沿岸地區，煤價升幅較內陸地區細，加上旗下項目回報率一向優於同業，隨着發電量增加，只要煤價表現穩定，其盈利前景可看高一線，係一隻讓人揸得安心嘅實力股。作為參考，250日線支持位喺16.4元，五十二周高位喺19.9元。
戰報
中國建築（03311）
Sammi上周五指中國建築有力再上，股價果然創3.88元一年新高，以低位3.5元計，單日升幅有10.8%。
+10.8%
蒙古能源（00276）
錢進本月十日推介的蒙古能源（00276），當日低位3.11元，上周五一度升過上3.58元，累積升幅達15%。
+15%