香港有錢人何其多，長期負利率，存錢入銀行長期無息收，習慣唔執輸的香港人，又點會唔將錢調去其他資產，搵番三幾巴仙合理回報。掉番轉頭諗，假如美國經濟真係好似日本咁長期疲弱，未來幾年狂掟銀紙兼維持零息，看官又諗吓到時樓價係應該升定跌？

大市昨日未肯出現調整，筆者都頗意外，圍繞市場負面消息唔少，內地加強清查土地開發情況，市場亦傳中國銀監會建議商業銀行暫停發放第三套房貸款之外，仲建議房價升幅較大的城市，進行一旦房價下挫六成的壓力測試，連累內地股市整固。

九七年負資產樓蟹成為香港名產，對社會經濟造成的震撼猶有餘悸，樓市高位跌六成？係靠嚇抑或中央有先見之明？睇見近兩個月內地樓市交投又再回升，一線城市樓價開始炒風再現，逼近去年高位。

筆者相信，中央見之前的一連串冷卻措施藥力開始失效，再出口術試圖力壓市場對樓價見底的預期機會最大。近期內房股當炒，憧憬中央可能下半年對樓市及房地產發展再開水喉，目前睇，機會似乎渺茫咗少少，隨着內地銀行貸款未見放寬，估計像保利香港（00119）一樣，趁好價伸手集資活動，仲會陸續有來。

內房抽水陸續有來

講開保利集資又係一個意外，周初公布中期業績，管理層才澄清無集資及發債計劃，殊不知轉過頭就出手，一來就集資35.2億元，在短短十四個月內，保利三次批股集資，儘管批股價愈批愈高，但股東還是要考慮被攤薄的問題。

今次集資，保利只表示會為未來增加土儲部署。睇番中期業績，保利長短債務分別有115億元及105億元，減去手頭現金110億元，淨負債約110億元，股東資金171億元，淨負債比率64%，集資後降到約44%（如果下半年如計劃有53億元人民幣售樓收益回籠，是否急需集資實屬見仁見智）。集資後每股資產淨值約6.43元，市帳率1.38倍唔貴。

睇番保利○九年兩次批完股之後再升，但此一時彼一時，只怕陸續有內房股批股餵飽基金，如果8.8元批股價守唔住，可能需要一段時間消化。