低調出席叁龍記招

柯公子外表斯文，十足青年才俊，行事仲好低調。太子尋日喺「叁龍國際」（00329）嘅記者會上見到佢，佢靜靜地坐埋一邊，即使主人家喺場內，不斷派發電子煙畀各位嘉賓試吸，柯公子都無食埋一份，似乎唔多想引起其他人注意。

不過，當太子走過去同佢傾偈，佢都好大方咁自我介紹，話今次係以嘉賓身份撐場，有機會都會試吓支電子煙。

「叁龍國際」呢間公司以前叫如烟集團，「叁龍」原來代表過去、現在及未來，雖然主席王彥宸已宣稱，暫時唔諗住喺香港賣電子煙，但將來就會全力拓展電子煙等三大業務，兼捍衞電子煙嘅知識產權，因為呢支煙毛利率都幾高咁話。家陣公司仲同各地大型煙草商尋求緊合作機會，所以供股後所得資金仍未有定案，但王主席重申，之前減持公司股份，基於私人財務需要，公司財務狀況穩健。