本文重點
唔經唔覺，強積金喺香港快將邁向十周年，雖然強積金一向有唔少地方為人所詬病，但係近期都有唔少改進。好似強積金「半自由行」就快實施，供款人可以為自己所作嘅供款選擇強積金公司，到時強積金公司好大機會要重新洗牌，強積金嘅龍頭滙豐銀行亦都唔敢怠慢，加緊宣傳，仲推出咗一個攝影比賽添。
呢個名為「滙豐強積金十周年攝影比賽」嘅活動，分為公開組同埋少年組，即係分開成年人士同埋十歲至十七歲嘅參加者，兩組嘅獎品都係一樣，冠軍可以得到38,000元旅遊禮券，活動直至十月底。
總行25歲搞歷史展
滙豐除咗搞強積金十周年活動之外，滙豐總部都有另一項慶祝活動，原來滙豐總行大廈喺皇后大道中1號，經已豎立咗二十五年，佢哋會喺下星期至八月二十日期間舉辦展覽，展覽內容包括滙豐自一八六五年成立以來4幢總行大廈的歷史，及現時總行大廈的設計和興建，滙豐香港區總裁馬凱博會出席。