本文重點
港股做好，近期大幅下調嘅家電股，即時大受追捧，從走勢上睇，以威靈控股（00382）最買得過，股價由四月初嘅高位0.535元回落，上周五收0.32元，跌近40%，內地家電補貼政策再度延長，未來業績肯定更理想。相對威靈股價已跌過龍，正係吸納良機，短期就算上番跌幅嘅一半，股價已可見0.4元過外。
威靈主要為出售家用電器之電機同電子電器產品，包括空調同冰箱以及洗衣機之電機產品，去年盈利大升80%至3.54億元，每股獲利2.62仙，派息0.5仙。內地家電下鄉以及以舊換新政策全面擴大，由九個省市增至28個省市，實施期亦延至明年底，估計內地家電將維持強勁嘅增長勢頭，保守估計今年盈利再增50%，預期市盈率只有八倍。
隨時藉注資飛天
威靈母公司美的集團係內地白色家電嘅龍頭企業，年產品銷售近千億元，注資壯大威靈已傳聞多時，一旦落實，威靈將脫胎換骨。
威靈控股（00382） 目標價：0.4元 止蝕價：0.28元