世界盃休戰兩日，今晚開始進入四強爭霸戰階段，志強呢期專注睇波賭波，日間冇乜精神炒股，大市回調對小弟亦唔多影響。不過，睇見港股同外圍股市走勢就唔多開胃，恒指ADR跟隨歐美股市再插，今日20,000點關難保，估唔到未等到農行（01288）上市，大市已頂唔住跌先一步。大市氣氛差，股仔一樣無得玩。呢期都係吼位低吸優質股，至少防守性較強，大市唔就，仲可以坐貨守一守。
重慶機電（02722）今年接單情況理想，截至四月底止，公司主要業務定單已達產量目標55%以上，料全年業績錄得穩健增長。重機亦已完成收購PTG旗下6間歐洲公司，對集團長遠發展有利。再睇番重機有多個基金股東持股量超過5%，其中GE Asset Management在上月廿二日再以均價2.006元增持，目前其持股量達11.05%。咁多基金睇好，可見其質素不俗，以現價市盈率約十倍計算，估值便宜，可吸納作中長線投資，止蝕位1.8元。
重慶機電（02722）目標價：2.2元 止蝕價：1.8元