雖然低息期比預期更長，但港股表現唔見得比預期好，上半年恒指跌咗1,743點或者8%，表面睇跌幅唔算大，但期間恒指兩起兩跌，如果炒期指諗住今年係單邊升市或者單邊跌市，已經被淺水浸蛟龍。睇番恒指成分股，跑贏大市的有20隻，跑輸23隻，受負面消息及工潮影響的富士康（02038）最傷，跌43%，但論到影響大市最深的要數滙控（00005）及工行（01398），股價分別跌18.7%及11.1%，令恒指唔見咗801點，差不多等於指數總跌幅四成六。
芬佬避險取態明顯
反之，上半年表現最好排序是潤電（00836）、港燈（00006）、中海油（00883）、煤氣（00003）、利豐（00494）及中電（00002），升幅介乎15至7.6%，由公用股六佔其四可見，芬佬睇唔通索性搵高防守性股份避險的取態相當明顯，基金半年結報告未到手，但據聞唔少對沖基金與傳統基金上半年都表現麻麻，同小股民一樣，惟有期望下半年港股可以搵到出路。
史提芬身為咖啡迷，對幾間大型連鎖咖啡店的消息特別留意，其士泛亞（00508）宣布向華創（00291）出售Pacific Coffee八成股份，作價3.27億元。翻查資料，其士是○五年五月，以1.8億元買下Pacific Coffee，交易後，保留兩成股份，一買一賣產生1.64億元帳面利潤，周三所見，股價有所反應，升0.04元，報0.66元，升幅6.5%。
其士泛亞估佢唔到
呢單交易真係估佢唔到，事關兩星期前，其士泛亞才以0.53元批1.2億股出街，集資6,150萬元，由年報所見，其士本身有超過9,000萬元淨現金，仲以為會將咖啡連鎖店「發大嚟搞」，點知轉過頭就將檔生意賣畀華創，最古怪仲係剩番規模有限嘅Igor's餐廳生意，兩成PC股權（按交易計值8,175萬元）同4.8億元現金，但市值就高達16.7億元，股價存有大幅溢價，到底變番殼股後葫蘆裏賣咩藥？認真耐人尋味。
股價悶咗半年的中國燃氣（00384），假期前火燒冷灶，逆市升到兩個月高位見4.39元，事緣公司發出盈喜，估計一○年三月底年度業績受惠利率掉期合約公允值變動，有大幅增長。查實即使沒盈喜，單睇截至九月底的中期賺4.3億元，比○九年全年1.03億元多四倍幾，全年成績表靚絕，早是意料之內。
內地大力發展潔淨能源，中央支持管道燃氣產業，短短幾年發展是有目共睹。不難解釋市場點解對燃氣股寵愛有加，試想香港只係一個七百萬人市場，已經為煤氣提供每年45億至50億元利潤，像中國燃氣，手上覆蓋80個城市，每個城市核心地區潛在用戶至少250萬戶，可以預期，當營運模式由搶佔山頭（接管）到轉向賣氣收入為主，潛力不能睇小，或者穩陣計，可以等埋下周三業績後研究一下至買，但相信4.2至4.4元入市風險唔大。