面對愈來愈多關於「中國經濟衰退」嘅分析出現，國務院總理溫家寶開腔，力撐內地經濟正朝着預期發展穩快增長，官方傳媒更高調批評有人要藉唱淡中國經濟而圖利。而阿莊就認為，憂慮內地經濟復甦放慢之論並非危言聳聽，特別係下半年出口市場表現，可能未及年初預期，近期股市疲弱，正係反映次季經濟復甦步伐放慢，若第三季經濟政策把握得不好，後果可大可小。
回說香港，再有兩幅勾地表中的官地被成功勾出，分別位於何文田及紅磡灣，睇嚟眼見樓價落唔到幾多，政府都要硬着頭皮增加多啲市區地皮供應，以減民怨。
唔知大家覺唔覺，呢期發展商推出嘅市區新盤，動不動就話要成萬蚊一呎，係咪真係有咁多市民可以負擔得起，實乃疑問。依照往年樓市走勢，阿莊認為今年第三季初係出貨時候，用家可以留待年尾或明年初再作入市考慮。
港股假前守住20,000點關，但農行（01288）招股氣氛，唔多唔少受近日內地股市下跌所影響。富士康（02038）發盈警，業務復甦進度令人失望，前日股價急跌6.92%，足以反映投資者嘅不滿，睇嚟出口股衰運未行完。
旺旺大有炒作空間
內需股估值唔算便宜，但勝在國策支持力度有增無減，若嚟緊市況再度調整，又可留意低吸機會。食品飲料股旺旺（00151）前日早段隨大市低開見6.2元後，見買盤積極吸納，尾市見全日高位6.64元，收市報6.6元，升2.1%，成交1.6億元。
雖然內需持續強勁，但競爭亦十分激烈，營運商必須擁有較強的市場觸覺和進取嘅推廣策略，才能保住市場份額。旺旺近年着手重組分銷商，踏入下半年成效漸現。今年以來米果及奶類飲料銷售優於市場預期，次季推出嘅新袋裝飲品市場反應正面。另外，管理層正積極部署推出毛利較高嘅水果酒飲料，期能豐富產品組合，提升整體毛利率。
目前，旺旺股價仍處於去年初以來嘅上升通道，惟若短線反彈未能衝穿6.8元，建議不用心急進場，可待回落至50日線6元或樓下再逢低收集，估計下半年股價將介乎5.5至7元，有足夠操作空間。
戰報
葉氏化工（00408）
史提芬周二推介葉氏化工，股價由當日低位7.45元，升至周三收報7.9元，升幅達6%。
敏華控股（01999）
May上月二十三日推介的敏華，於周三升過上7.68元，較推介當日低位7.3元累升逾5%。