講開內銀股，交通銀行（03328）供股權（02918）昨日首天交易，正股收市報8.71元，跌0.46%；供股權收報3.59元，成交9,232萬元。阿莊相信，呢隻內銀股長線可為股東帶來理想嘅投資回報，故支持交行股東參與供股。
不過，早前交行A股（601328）配售嘅38億股新股，亦將於本周三上市，全為無鎖定安排。由於新股配股價只係4.5元人民幣，而交行A股現價6.38元人民幣，面對逾四成嘅利潤，除了承諾六個月內不售股嘅中國財政部之外，其他認購者會否沽出獲利，從而對A股表現造成短線沽壓，就要拭目以待。
同樣將於本周三開始招股嘅，據講仲有昨日召開推介會嘅中國智能交通（01900），此新股獲多個海外基金及本地富豪撐場出任策略性投資者，主要做高速公路及鐵路專業解決方案業務。
近幾年內地積極投放資源改善運輸網絡，以配合地區經濟發展，帶動運輸基建相關解決方案服務需求，睇格局呢隻新股值得關注。
私有化料獲通過
審議駿威（00203）私有化建議嘅法院會議及股東會議，將於七月十六日舉行，若順利獲得通過，估計廣汽H股將於八月三十日以介紹形式在港掛牌。經本月初上調私有化換股比例後，每股駿威股份可換廣汽0.474026股H股。包括法巴及獨立董事委員會均建議股東贊成駿威嘅私有化計劃。
未來內地汽車業政策將向大型本土車廠傾斜，既然母公司廣汽要整體上市，站喺長遠業務發展嘅角度睇，駿威股東實可考慮接受私有化建議，改為持有廣汽股份。
早前市場焦點大多落在私有化嘅作價身上，但經過本月初提高私有化條件後，作價已增吸引力，加上有基金股東表態接受私有化建議，相信最終獲通過嘅機會較高。
雖然，駿威嘅私有化建議是否獲得通過尚存變數，風險因素不容抹煞，但相信喺提價過後，形勢已有所改善，這從近月駿威股價表現反覆回升得到引證。若短線能以大成交重上250日線4元關樓上，可投機性跟進，目標重返四月下旬高位4.68元，止蝕位則訂於3.65元。
戰報
神州數碼（00861）
錢進於本月十八日推介神州數碼，其後股價穩步上揚，昨日最高見13.54元，累積升幅9%。
弘海（00065）
冼金基上周四指弘海突破下降軌，當日低位1.5元，昨日股價最高升過上1.67元，升幅達11%。